Prentsaurrekoa eskeini dugu Bilboko La Bolsa eraikinean, Audientzia Nazionaletik heldu zaigun azken autoaren berri emateko.

Auto honetan, Andreu epaileak ez esan zion Espainiako Polizia Nazionalaren eskakizunari: urtarrilaren 9an Sarek egindako kuestazioan bildutako diruaren nondik norakoak ikertzea.

Prentsaurrekoan, Joseba Azkarragak eta Ainhoa Azkaratek legegile talde batez lagunduta, jarraipen hauek salatu dituzte, Sareren lanaren ildoak berdinak direla aldarrikatuz: “Euskal preso, iheslari eta deportatuen eskubideen alde lanean jarraituko dugu, gardentasuna mantenduz”. Gainera, orain dela urtebete baino gehiago hartu ziguten diru kopurua oraindik bueltatau ez digutela salatu dugu, “eta orain, argi dago, diru hau bueltatu beharra dagoela, argi geratu baita orain dela urtebete egon zen operazioak ez daukala justifikaziorik”.

Bukatzeko,gure lanarekin jarraituko dugula argi eta garbi utzi dugu eta, beste behin ere, gure lanarekin jarraitzeko euskal jendarteari laguntzeko dei egin diogu.

Horretarako, bazkide egiteko deia luzatzen diogu gure lana beharrezkoa ikusten duen edonori, informazio guztia sare.eus web orrian topatuz.

Gaurko egunean, pozezko albistea jaso dugu: Lorentxa Guimonek ez du espetxean jarraituko.

Pozez hartu dugu albistea; bai, pozez. Izan ere, ez genituzke horrelako albisteak jaso behar, batez ere, gaixo dauden presoek etxean beharko luketelako, denak, salbuespenik gabe. Bai Frantziako estatuko espetxeetakoei dagokienez eta Espainiako estatuko espetxeetakoei dagokienez ere bai. Sufrimenduari ateak itxi nahi dizkiogulako, lehenbailehen, eta herri honek merezi duen konponbide eta bizikidetzari ateak parez pare ireki.

Beste behin ere, larritasun egoera gorenean aurkitu behar izan da Lorentxa Guimon epaia bere alde agertzeko. Erietxean behin baino gehiagotan bukatu behar izan du azkenean, baldintzapeko askatasuna lortzeko. Ezin da errepikatu. Ez da posible. Hasieratik, preso dagoen pertsona bati gaixotasun larria diagnostikatzen dioten unetik, pertsona horrek ezin du espetxean jarraitu. Giza eskubideen kontua da larriki gaixo dagoen presoa etxean egotea; espetxe politika ankerrenaren adierazle da espetxean pertsona hauek mantentzea. Argi eta garbi: gaixo dauden presoek etxean egin behar diote aurre gaixotasunari, euren eremu afektibotik hurbil. Aitzakirik gabe, salbuespenik gabe.

Oraindik ere, gaixorik dauden presoak ditugu espetxeetan. Jose Ramón Lopez de Abetxuko, Aitzol Gogorza, Garikoitz Arruarte, Gorka Fraile, Ibon Fernandez Iradi, Iñaki Etxeberria, Ibon Iparragirre, Jagoba Codó, Josetxo Arizkuren eta Txus Martin. Espetxeetan gaixotasun hauei aurre egitea edozein ikuspuntu humanotik at dago; espetxean eta sakabanatuta are gutxiago. Guimonen kasua aurrekaria izatea espero dugu, azkar jorratu beharreko aurrekaria. Instituzio guztiek, justizia eremukoek  barne, pausoak eman behar dituzte, inoren zain egon gabe. Giza eskubideen errespetua bermatzen duen edonork azkar ulertuko du larriki gaixo dauden presoek etxean egon behar dutela.

Otsailaren 14an, preso gaixoen etxeratzea eskatuko duen dinamika aurkeztu genuen Oreretan, urtarrilaren 9ko Bilboko eta Baionako mobilizazioen ostean aurkeztu genuen “Hartu trena!” dinamikaren baitan kokatzen dena. Dinamika honen helburua, giza eskubideen trenera ahalik eta bagoi gehien batzea izango da, bakea izango den azkenengo geltokiraino iritsi arte. Bagoi hauetako bat izango da Oreretan aurkeztutakoa, herriz herri joango dena preso gaixoen askatasuna eskatuz. Espero dugu, lehenbailehen bagoi hau behar ez izatea; alegia, preso gaixo guztiak etxean egotea, larria delako, urgentea da!

Lorentxa Guimonek espetxea atzean betiko uztea espero dugu. Baina Guimonek atzean utziko duen bezala, gaixo dauden preso guztiekin berdin gertatu behar da. Hori bai, soilik konpromisoak batuz eta konpromisoak aktibatuz lortuko dugu helburu hau. Lortu, lortuko dugulako, ziur. Eremuz eremu bagoiak betetzeko apostua egin dugu eta horretara goaz; giza eskubideak, konponbidea eta bakea defendituko ditugulako; horretan dihardugu eta horretan jarraituko dugu.

Ostirala 26, arratsaldeko 19:00etan eliz ataritik.

Giza Eskubideak | Konponbidea | Bakea

Euskal Presoak Euskal Herrira

Sare herritarrak larriki gaixorik dauden euskal presoen askatasuna aldarrikatzeko dinamika berria aurkeztu du Oreretan, herriz herri joango den dinamika.

Prentsaurreko honen aurkezleak Aurkene Astibia eta Jose Mª Agirretxe (Porrotx) izan dira, eta argi eta garbi adierazi dute gaixotasun larriak pairatzen dituzten 11 euskal presoek etxean behar dutela, euren gaixotasunei ahalik eta modu onenean aurre egiteko.

Azaldu dutenez, “larriki gaixorik” eta “espetxea” esaldi berean sartzea edozein ikuspuntu gizatiarretik at dago. Gainera, Sare ez da bakarrik egongo “Hartu trena!” dinamikan: Txus Askatu, Iparra Galdu Baik eta Durangon Gorka Fraileren askatasuna eskatzeko sortutako plataformak bidelagun izango ditu.

Gaixorik dauden euskal presoen (Jose Ramón Abetxuko, Aitzol Gogorza, Garikoitz Arruarte, Gorka Fraile, Ibon Fernandez Iradi, Iñaki Etxeberria, Ibon Iparragirre, Jagoba Codó, Josetxo Arizkuren, Lorentxa Guimon eta Txus Martin) herrietatik joango da Juan Gorriti eskultoreak egindako lekukoa. Lehenengo geltokia, Orereta bera izango da.

Borondateak mugitzeko tren bat jarri genuen martxan urtarrilaren 9an, giza eskubideen trena alegia. Ibilbide honetan, zalantzarik gabe, larriki gaixorik dauden presoen etxeratzea ezinbesteko pausua da. Herriz herri, auzoz auzo, eremuz eremu eta norbanakoz norbanako, giza eskubideen alde egotetik giza eskubideen alde lan egitera pasatzea lortu behar dugu, eta horretarako “mediku, trikitrilari, ikasle, langile, jubilatu… guzti guztiak gara beharrezkoak giza eskubideen defentsan, eta preso gaixoei dagokienez denbora ezinbestekoa da. Urgentea da, berandu baino lehen etxean izan behar dira larriki gaixo dauden presoak!.

Sare herritarrak prentsaurrekoa eman du gaur goizean Gasteizko tren geltokian.

Prentsaurreko honetan, Sarek, Euskal Herria guztian zein mundu guztian zehar zabaltzea helburu duen manifestu iraunkorra aurkeztu du. Giza eskubideen defentsan aritu nahi duen ororentzat dago prestatuta manifestu hau, euskal preso, iheslari eta deportatuen eskubideen errespetua oinarri hartuz.

Ainhoa Azkaratek eta Joseba Azkarragak azaldu dutenez, urtarrilaren 9an argi geratu zen milaka herritarrek beste pauso bat eman nahi dutela konponbidera eta bakera begira, eta hala erakutsi zuten Bilbo eta Baionako kaleak betez. “Hartu trena” dinamikaren baitan, eremu ezberdinak trenera igotzeko gonbitea luzatu dute biek ala biek, eremuz eremu ere ikusaraziko dena. “Auzo elkarteek presoen giza eskubideen urraketak azaltzen dituzten informazio puntuak antolatu ditzakete auzoan, ikasleek hitzaldi informatiboak azaltzen dituzten bitartean” azaldu dute Azkaratek eta Azkarragak.

Baina trenak, azaldu dutenez, azkenengo geldialdi bat izango du, euskal jendartea konponbidera eramango duena. Bukatzeko, azaldu dutenez, gaurtik irailera bitartean milaka herritar bildu nahi ditugu manifestu honen inguruan, bizikidetzari ateak irekiz eta sufrimenduari parez pare itxiz.

Giza eskubideen alde egotetik giza eskubideengatik lan egitera pasatzeko prest gaude, eta horretara goaz.

Larri gaixo dagoen Lorentxa Guimon euskal presoa erietxera eraman dute, hirugarrenez azkenengo bi hilabeteetan.

Sare herritarretik uste dugu, argi geratu dela euskal presoen aurkako mendeku eta gorroto espetxe politika hau ezin dela luzatu, preso gaixoek etxean egon behar dutelako, lehenbailehen. Otsaila amaieran erabakiko dute Guimonen baldintzapeko eskaera, baina ezin dugu hainbeste itxaron.

Sare herritarrak bake prozesua indartzeko sortutako Foro Sozialean hartuko du parte, urtarrilaren 30ean Gernikako Lizeo Antzokian.

Lehenengo Foro Sozialak (2013) harrera handia izan bazuen ere, bakean sakontzeko eta aurrerapausoak emateko beharra ikusten dute antolatzaileek, eta Sarek oinarri ideologikotzat giza eskubideak, konponbidea eta bakea izanda, bertan egongo dela iragarri nahi du.

Euskal presoen giza eskubideak errespetatzea eskatu zuten bertaratutako nazioarteko zenbait adituk, baina Euskal Herrian ez da aurrerapausorik eman zentzu honetan. Ipar Euskal Herrian bai, ordea, besteak beste, 2015eko ekainaren 11n Pariseko Asanblada Nazionalera eramanez Euskal Herriko bake prozesua, konferentzia humanitario baten baitan.

Gernikak duen sinbologia aprobetxatu nahi du Foro Sozialak bake prozesuan beste pauso bat emateko, eta bertan, iritzi ezberdinetako persona anitzen artean, Sarek euskal presoen giza eskubideen defentsan sakontzeko beharra azpimarratuko du, konponbideari eta bakeari bultzada nabarmena eman ahal izateko. Horretarako, bai presoen eta baita euren senitartekoen eskubideak errespetatuak izateko, ezinbestekoa da sakabanaketarekin amaitzea eta euskal presoak Euskal Herrian lehenbailehen egotea.

Foro Sozialak Bagoaz gogoeta goraipatu du, alderdi ororen hautetsien sostengua lortuz konponbidean pausoak emateko. Saretik ere hala uste dugu: instituzionalki zein egunerokotasunean bat egin behar dugu euskal presoen giza eskubideen defentsan jarduteko.

Egunean bertan, Kolonbiako bake prozesuaz mintzatuko dira Carlos Alberto Ruiz abokatua eta Alberto Spektorowsky HNT-ko kideak. Armagabetze prozesuetaz eta gizarteak jokatu beharreko paperaz hitz egiteko tartea ere egongo da, besteak beste, Bryan Currinek parte hartuz.

Bukatzeko, Sare herritarretik uste dugu horrelako ekimenak sustatzea eta aurrera ateratzea ezinbestekoa dela. Errespetuz, gai ezberdinen ondorioak mahai gainean jarriz, iritzi ezberdinak elkarbanatuz … Baina giza eskubide guztien errespetua helmuga izanda.

Urtarrilaren 24an, igandean, zorigaiztoko beste albiste baten berri izan genuen.

Hilaren 10ean Bilbo eta Baionako kaleetan egin zituzten presoen eskubideen urraketen kontrako manifestazioetatik, modu sinbolikoan, “Giza Eskubideen Trena” atera zen, eta Oiartzunen prest daude bagoietara igotzeko. Izan ere, herriko presoek zein beren senideek pairatzen duten dispertsioari ezetz ozen esan nahi diote. Eta ez oihu eginez, musikaren bitartez baizik. Horregatik, Sare Herritarraren ekimenez, oiartzuar talde batek Dispertsio madarikatua abestia sortu du.

Atzo arratsaldean aurkeztu zuten kanta, eta bertan adierazten den bezala, dispertsioa “ilegala, bidegabea, krudela, zigorra” da Sare Herritarraren ustez.

Kanta, baina, “erronka polit baten hasiera” besterik ez dela jakinarazi zuten. Datorren maiatzean, lipdub-a grabatu nahi dute Oiartzunen, Dispertsio madarikatua-ren doinuekin dantza eginez. Horregatik, oiartzuar guztiak animatu dituzte abestia ikas dezaten: “Nerabe, zahar, ume, gazte zein helduon ahotan, doinu berri honekin dantzan jartzen ditugun hitzak eta argiak izango dira dispertsioaren aurkako salaketan”. Udalerriko kaleak, lantegiak, ikastetxeak, bulegoak, komertzioak, tabernak, mendiak eta beste hainbat txoko Dispertsio madarikatua kantaren doinuekin betetzeko dei egin zuen Sare Herritarrak. Abestia ikasten hasi nahi duenak, herriko tabernetan eros dezake diskoa, borondatearen truke.

“Argi dago”, gaineratu zuten agerraldian, “Bilbo eta Baionatik atera zen trenak gaur eta hemen baduela Oiartzungo lehen geldialdia. Igo zaitez, beraz, zu ere Giza Eskubideen Trenera eta lipdub-aren geltokian elkartuko gara!”. Horrela, udaberrian, herriko kale eta plaza musika “musika eta kolorez” betetzen, “azken helmugara” iristeko indarrak hartuko dituztela ziurtatu zuten, “euskal presoen eskubideen urraketaren amaierara”, alegia. Bukatzeko, abestiaren pasarte bat gogorarazi zuten: “Buka dezagun honekin, elkar gaitezen denok batera, indarrak batuz lortuko dugu, lortu behar dugu!”.

KRONIKA: Erik Gartzia | Oarsoaldeako Hitza