Berria ez den albistea, baina gogorra bezain krudela bihurtu den berria: euskal preso baten lagun batek istripua izan zuen bisita baten bidean zegoelarik. Oraingoan, Olga Comesen adiskide batek pairatu behar izan zuen istripua, Mansillako (Leon) espetxera bisita baten bidean zegoelarik. Istripua Nafarroa eta Errioxa arteko mugan eman zen, kotxea errepidetik atera ostean. Istripua pairatu zuen lagunak ospitalean bukatu zuen, eta ondorioz, berak eta Olga Comes presoak bisita galdu zuten.

Zoriontzekoa da istripuak ondorio lazgarriagoak ez izatea. Baina ezin gara pozik agertu; gertatzen ari dena larria da eta premiazkoa da lehenbailehen amaiera ematea honi. Honi amaiera ematen ez badiogu, egun batetik bestera, asteburu batean zein hurrengoan, beste istripu baten aurrean egon gaitezke. Ezin dugu onartu, dispertsioan oinarritutako espetxe politikak ezin du aurrera egin.

Dispertsioak jada 16 pertsonen bizitzak eraman ditu aurretik, azkena 2007ko Eguberri egunean. Hala ere, azkenengo bederatzi urte hauetan euskal presoen senide zein hurbilekoek jasan behar izan dituzten istripuak hamaika izan dira. Batzuk ondorio krudelagoak izan dituzte, beste batzuk ez hainbeste. Hala ere, ekiditu zitezkeen ondorioak izan dira batzuk zein besteak.

Horregatik, Sare herritarretik, dispertsioarekin bukatzeko bidean jendarteko esparru ezberdinei adierazi nahi diegu:

> Hasteko, dispertsioa eta sakabanaketa bizirik mantentzen duten arduradun guztiei hauekin lehenbailehen bukatzeko eskatzen diegu. Presoen eskubideak urratzeaz gain, argi geratu da beste behin ere hauen senide zein adiskideen eskubideak urratuak izaten ari direla.

> Dispertsioaren amaiera eragin ditzaketen arduradunei ere pausoak emateko deia egiten diegu. Espero dugu, zentzu honetan, herri honetan zein Espainia eta Frantziako estatuetan ematen ari diren aldaketek hau lehenabilehen eragitea. Une historiko hau aprobetxatu beharra daukagu giza eskubideen defentsan sakontzeko. Nafarroako Parlamentuak astelehenean egindako salaketak bide honetan laguntzen du; hala ere, beharrezkoa da bide honetan sakontzea.

> Euskal jendarteko sektore zein pertsona ezberdinak aktibatzeko ordua da; giza eskubideen alde egotetik giza eskubideen defentsan lan egiteko gonbitea luzatzen dugu. Horretarako, urtarrilaren 10ean, aurreko eguneko mobilizazio anitz eta jendetsuaren ostean, martxan jarri genuen “Hartu trena” dinamikan parte hartzeko gonbitea luzatzen dugu. Bakoitza bere sektorean, bakoitza bere konpromiso mailarekin; baina denok izango dugu hekburu berdina. Giza eskubideen, konponbidearen eta bakearen alde lan egitea eta helburuak gauzatzea.

Giza eskubideak | Konponbidea | Bakea