sarenaiz
Araitz-Beteluko egunean 1.000 kg harria mugitu zuten
1.000 kg harria baietz mugitu!
Pasa den asteartean, abenduaren 8an, Araitz-Beteluko egunaren barruan, dispertsioaren amaiera aldarrikatzeko, Beteluko plazan dagoen 1.000 kiloko harria mugitu zuten hainbat lagunek, azken 100 urte baino gehiagotan mugitu ez den harria mugitu zuten denok batera tiratuz.
Modu honetan, urtarrilaren 9an Bilbo eta Baionara joateko deialdia egin zuten.
Aske eta bizirik nahi ditugu, larriki gaixorik dauden presoak etxera
Milaka pertsonek parte hartu dute Durangoko manifestazioan.
Durangon, gaixotasun larriak dituzten euskal presoak askatzeko eskatuz eguerdian burutu dugun manifestazioa oso jendetsua izan da. Bi mila lagun inguruk “Aske eta bizirik SOS, larriki gaixorik dauden presoak etxera” leloarekin bat eginik Durangoko kaleak zeharkatu ditu, besteak beste, “etxean nahi ditugu libre eta bizirik”, “Giza Eskubideak non daude” eta “gaixo larriak etxera” ohikatuz. Ondoren, ekitaldian, egoeraren larritasuna nabarmendu dugu. Teresa Toda eta Maika Tameron Sareko ordezkariek Euskal Herritik jendarteak zein erakundeek egindako eskaerei entzungor egiten dioten Madril eta Parisko agintarien jarreraren aurrean, denon indarrak batzearen garrantzia ere aldarrikatu dute: “Behar beharrezkoa da indarrak batzea, hemen elkartu garen guztiona eta baita etorri ez diren guztiena ere. Iñurrien lanarekin segi behar dugu, soilik horrela lortuko baitugu harriak mugitzea”.
Gaixotasun larriak dituzten presoak askatzeko eta dispertsio politikarekin amaitzeko eskaera zabala da euskal jendartean, erakundeek ere sarri aldarrikatu dute; bakearen eta konponbidearen aldeko urrats garrantzitsua izango litzateke. Baina, Madril eta Parisko gobernuek entzungor segitzen dute, kartzeletan sufrimendurik ez da arindu eta beraz, argi adierazi dugu oinarrizko eskubideei egiten zaizkien erasoei erantzuten eta urraketak salatzen jarraituko dugula. “Guztiok batera tiratuta lortuko dugu etxera ekartzea.”
Jakina da kartzela politika arintzeko ez dutela Gobernuek, ez asmorik ez borondaterik. Ozen salatu dugu eguerdiko ekitaldian giza eskubideak urratzen jarraitzen dutela, _horren adibide latzena da gaixorik egon arren preso dauzkatenen egoera_ eta hori aldatzeko, komeni dela herritar gehiagok bere ekarpena egitea. “Gutako bakoitzak gure eremuan egin behar dugu lan, gure lagun artean lehenengo, eta baita inguruan, lankide, eskola edo unibertsitateko kide zein gure auzoko bizilagun guztien artean. Horiek guztiak aldarrikapen honi lotuta soilik lortuko dugu erronka, eta utziko dute gaixo diren presoak kartzela. Aukerak izango ditugu parte hartzeko. Abenduaren 10ean Giza Eskubideen adierazpen unibertsalaren 67 urteurrenean hainbat herritan burutuko ditugu ekimenak. Eta urtarrilaren 9an manifestazioak Bilbon eta Baionan, “Mugitu daitezen harriak. Euskal Presoak Euskal Herrira. Giza Eskubideak, konponbidea eta bakea” leloarekin.
> Pretsan bildutakoak
> NAIZ
Reivindican en Durango la puesta en libertad de los presos gravemente enfermos.
Unas 2.000 personas han secundado, según el recuento de GARA, la manifestación convocada por Sare para reivindicar la puesta en libertad de los presos gravemente enfermos. Han remarcado la importancia de aunar esfuerzos alrededor de esa reivindicación.
> BERRIA
Manifestazio jendetsua egin dute Durangon, gaixo dauden presoak aska ditzatela eskatzeko.
Sare plataformako bozeramaile Teresa Todak dei egin die herritarrei urtarrilaren 9an Bilboko eta Baionako mobilizazioetan parte har dezaten.
> EITB
‘Gaixo dauden presoak etxera ekartzeko’ deia egin du Sarek Durangon.
“Aske eta bizirik SOS, larriki gaixorik dauden presoak etxera” lelopean, manifestazioa egin dute milaka lagunek.
> Deia
Sare llama a aunar esfuerzos para “traer a los presos enfermos a casa”.
Alrededor de dos mil personas, según los organizadores, han secundado la manifestación convocada por Sare que ha recorrido al mediodía las calles de Durango para pedir la excarcelación de los presos de ETA con enfermedades de gravedad.
Aske eta bizirik
Marilo Gorostiaga, Jon Kirru Iparragirre
Euskal presoen hainbat giza eskubide urratzen dira Kartzeletan, jakina. Osasun eskubidearen urraketa da guztien artean larriena, zalantzarik gabe. Giza Eskubideen arloan diharduten hainbat pertsonek, legelariek eta oro har, euskal jendarteak eta erakundeek, gaixorik dauden presoen egoera behin eta berriro salatu badute ere, Madrilgo eta Parisko agintariek ez dute jarreraz aldatzen, ez diete eskaerei jaramonik egiten eta kartzelan dauzkate bere ingurutik urruti etxekoen eta lagunen babesik gabe.
Gaixotasunak ez daude erritmo politikoei begira, okerrera egingo dute konponbiderik jartzen ez bada, azken finean, frantziar eta espainiar kartzelatako ziega ilunetan itzaltzen ari diren persona horien bizitza dago jokoan. Aipagarria da, beste presoei onartzen zaizkien neurririk ez eskubiderik ez dutela euskal presoek, soilik eurei aplikatzen zaizkien legeek ahalbidetzen dutela egoera latz hori.
Salbuespen legediak ezarritako baldintza gogorrak eta xantaia dira egun kartzeletan eguneroko ogia. Justizia eta giza eskubideak baino gorrotoa eta mendekua dira darabilten jokabide horren ardatzak. Barne Ministeritzak diseinatzen du kartzelatako politika eta gero, epaitegiek aplikatu Europako Giza Eskubideen Tribunalaren erabaki eta irizpideei kasu zipitzik egin gabe. Duela 67 urte abenduaren 10ean Parisen aldarrikatutako Giza Eskubideen Adierazpen Unibertsala herren da hemen.
Gaixotasun larriak dituztenek behar duten tratamendu egokiarentzat traba da kartzela kasu batzutan eta eragozpen handia bestetan. Eritetxera trasladoak abentura beldurgarri bilakatzen dira sarri, gizatasun apurrik dutenei oilo ipurdia eragiteko moduko egoerak bizi ohi dituzte horietan.
Gaixotasun sendaezinak dituzten presoek baldintzapeko askatasuna jasotzeko eskubidea dute, legedian jasotako neurriak aplikatu behar zaizkie, gaixotasunak ez dezan okerrera egin, konfiantzako medikuek artatu ditzaten, etxetik hurbil den eritetxean etxekoen eta lagunen goxotasun eta babesean.
Egun 12 dira gaixo dauden presoak, gehienak jaioterririk urruti, kilometro askotara kartzelan, zaintza egokirik gabe. Ibon Fernandez Iradi, Jose Ramon Lopez de Abetxuko Likiniano, Aitzol Gogorza Otaegi, Gorka Fraile Iturralde, Ibon Iparragirre Burgoa, Garikoitz Arruarte Santa Cruz, Txus Martin Hernando, Josetxo Arizkuren Ruiz eta Iñaki Etxeberria Martin, Lorentxa Guimon, Jagoba Codo Calleja eta Jose Miguel Etxeandia Meabe.
Euskal jendarteak pixkanaka zauriak itxi eta konponbidearen zein bakearen aldeko urratsak eman nahi ditugu, baina bi Gobernuen erantzuna eta jarrera ez da jendarteak espero zuena izan azken urteotan. Bidea oztopoz eta traba astunez beteta daukagu. Bideko harriak kentzeko denon ahalegina eta konpromisoa behar beharrezkoa dugu.
Gaixorik kartzelan daudenen egoera hain larria izanik ezinbestekoa da erantzun azkarra, bateratua eta indartsua, alperrik da Madril eta Parisen zain egotea; gure esku dago, gure ekarpena egin behar dugu; egoera irauli nahi dugun guztion indarrak batuta ekarriko ditugu gaixo dauden presoak etxera, gutako bakoitzaren ahalegina bestearenarekin elkartuta amaituko dugu sakabanaketarekin eta iheslari zein deportatuek jasaten duen jazarpenarekin, beti ere, erronka eta helburu handiagorik alboratu gabe: preso, iheslari eta deportatuak etxean ikusi nahi ditugu.
Bideko harriak mugitu behar ditugu! Hasi gara piskanaka, hurrengo erronka “Aske eta bizirik SOS, larriki gaixorik dauden presoak etxera” leloarekin Durangon asteartean burutuko dugun manifestazioa izango da, Liburu eta Diska azokaren ataritik 12:30etan abiatuta. Eta indarrak batzen jarraituko dugu Bilbon eta Baionan urtarrilaren 9ko mobilizazioan. Gure indarra zurearekin batuz, denon artean lortuko dugu.
