Berriak
Sare Gernikak "Ispilue proiektua" aurkeztu du
Gaur, urriak 23, euskal preso, iheslari eta deportatuen eskubideen aldeko sare herritarrak 2015ko urritik eta 2016ko ekaina bitartean garatuko duen "Ispilue proiektua"-ren aurkezpen ekitaldia dugu.
Berton, iazko balantzearen ondorio nagusiak konpartitu nahi ditugu, aurrena:
- SARE ezagutzera emon dugula uste dugu eta dispertsioa amaitzeko helburua konpartitzen dugunon arteko sarea martxan jarri, parte hartze garrantzitsuarekin.
- Dispertsioaren eta bestelako salbuespen neurrien ezagutzan eta sentsibilizazioan urratsak eman ditugu.
Egun gurean 7 preso daude etxetik urrun, sakabanatuta, beraiei eta euren senideei ez-legezko zigor gehigarri baten erruz:
- Jabi Abaunza Martinez, Moulins-Yzeure. 790 km.
- Kepa Arronategi Azurmendi. Almeria. 980 km.
- Ibon Goieaskoetxea Arronategi. Fleury-Megoris. 900 km.
- Eneko Goieaskoetxea Arronategi. Alcala-Meco. 430 km.
- Iñaki Dominguez Atxalandabaso. Jaen. 745 km.
- Oier Goitia Abadia. Murtzia. 800 km.
- Jone Amezaga Arriaga. Brieva (Avila). 445 km.
Ikasturte honetan ere erronka latza daukagula ondorioztatzen dugu: dispertsioa amaitu dadin behingoz egoera gordin hori ezagutzera ematen segitzeaz gain, sarekideak aktibatu behar garela deritzogu, gutako bakoitzak egunen baten dispertsioa amaitzeko helburua bete dadin inplikatuz, eta horrela, euskal gatazkaren behin betiko konponbidean urrats berriak ezagut ditzagun lagunduz.
Nolakoa izango da Ispilue proiektue? Bada, gaur ez dakargu erantzunik, proiektu zabal baten margoak izan daitezkenak dakarzkigu, sarekide guztion artean margoztu dezagun helburura eramango gaituen bidea. Beraz:
1. Ederra litzake alor desberdinetako jendea inplikatzea.
2. Sarekideen ekimena da proiektu honen motorra.
3. Ezinbestekoa da aniztasuna lantzea, desberdinen arteko sarea zabaltzea.
4. Gaur ez ditugun tresnak bidean sortuko ditugu.
5. Gure lana kaleratuko dugu. Hor datoz Gabonak; egutegian leku bat gordeko diogu urtarrilaren 9ko manifestazioari; eta ikasturteari amaiera ona emateko, helburua lortu izana erakusteko gogoz egongo gara.
Gaurko gure mezua ulertu duzuen esperantzan, proiektu honen lehenengo urratsa azaroaren 7an emango dogu, Astran beren beregi antolatuko dugun mintegian. Bihotz eta buruak ideekin beteta, eta hankak eta eskuak lanerako prest etorri zaitezten nahi genuke.
Eduardo Galeano idazle uruguayarraren "Espejos" liburua Xabier Alegria Loinaz Cadizgo Puerto III-ko espetxean preso zegoela euskarara itzuli bezala...
Ispiluak jendez lepo.
Ikusezinek gaituzte ikusten.
Ahantziek oroitzen.
Gure burua ikustean, haiek ditugu ikusten.
Gu joatean, badoaz?
Etxeragunea, larriki gaixorik dauden presoak etxera!
Ibon Iparragirre Burgoa euskal presoa Madrilgo Alcala-ko espetxetik Euskal Herrira ekarri dute epaiketa batera. Gaixo dagoen presoetako bat da, -ihesa dauka ibonek-, 2011. urtean epaileak espetxealdi arindua ezarri zion, 100.2 artikulua aplikatuz, bere gaixotasunari behar bezalako tratamendua eman ahal izateko.
2014. urtean, ordea, berriz atxilotu eta dispertsatu egin zuten Ibon; geroztik Madrileko Valdemoron lehenengo Alcalan gero preso izan dute eta bere gaixotasunak okerrera egin du.
Giza eskubideetaz ari gara, pertsona bat gaixo dagoenean espetxean mantentzeak ez du gizatasunik, eta legearen kontrakoa ere bada. Ibonen kasua horren adibide garbia da: sendaezina den gaixotasun bategatik 100.2 artikulua aplikatu zioten, espetxe arindua ezarri -espetxea ez zelako tokirik egokiena tratamendurako- eta urte batzuetara erabaki judizial hori aldatu eta espetxeratu egin zuten.
Honengatik guztiarengatik SAREk Ibonen eta gaixo dauden preso guztien askatasuna eskatzen du, euren bizitza eskubidea bermatua izan dadin, eta askatasunak ebazten diren bitartean preso guztien Euskal Herriratzea exijitzen dugu. Nahikoa da, ez dezatela presoen bizitzarekin jolastu!
Euskal jendarteak sufrimenduari ateak itxi nahi dizkio, giza eskubide guztien errespetua aldarrikatu, baita preso daudenena, eta konponbideranzko urratsak eman nahi ditugu. Horretan arituko gara Sarekideok, borondateak batu eta gobernuen inplikazio aktiboa eskatzen bake eskenatoki baterantz bideratzeko.
Honengatik guztiagatik, SARE-k, bat egiten du Bilboko Plaza Zirkularrean antolatuta dagoen Etxera-gunearekin, uste dugulako herritarron konpromisoa eta parte hartze aktiboa ezinbestekoa dela inmobilismoa mugiarazteko.
Herri kiroletara!
Larunbatean Aiztondo Bailarako AIZTONDORA egunaren baitan, arratsaldean burutu zen HERRI KIROLETARA ekimena arrakastatsua izan zen. Jende ugari inguratu zen preso eta iheslarien eskubideen alde ehuntzen ari den sareari ekarpena eginez herri kirolariek antolatu zuten ekimenera.
Nafarroatik Bilbora eta Baionara
Ainhoa Azkarate, Maria Luisa Mangado, Amaia Izko eta Arantza Amezaga.
Atseginez hartu genuen behean sinatzen dugun nafarrok giza eskubideak babesten diharduten bi taldeetako ordezkariak batera ikustea; pozgarria izan zen guretzat, toki adierazgarri horretan, mahai berean, diskurtso berberarekin biltzea denak, preso, erbesteratu eta deportatuen oinarrizko eskubideen alde elkarrekin lan egiteko.Goxotasun horixe sentitzen dugu, gainera, Sarek antolatzen duen ekitaldi orotan. Izan ere, unean uneko zailtasunak zailtasun, eta herri honen konponbideari jartzen dizkioten oztopo guztien gainetik gai baita ideologia ezberdineko pertsonak elkarrekin lanean jartzeko, batera, eskaera sinple, oinarrizko eta unibertsala eginez; soil-soilik, giza eskubideen errespetua eskatzen, alegia.
Poz handia sentitzen dugu, pentsaera desberdina izanda ere, eskutik helduta ahalegintzen garelako, esaterako, kartzela politika mendekatia indargabetzen; azken finean, kolore ezberdineko eskuek gure arteko aldeak beste gune baterako laga ditugulako, eta bat egin oinarrizko eskaera jakinen alde; besteak beste, espetxetako politikaren arduradunei eskatzen ari gara presoen sakabanaketa zein bakartzea uzteko, eri dauden presoak askatzeko, zigorren luzapena eteteko eta legea salbuespenik gabe aplikatzeko.Horixe bera da funtsean Giza Eskubideen alde egitea. Hain zuzen, eskubide ororen, konponbidearen eta bakearen alde ari den sare aktiboaren ahalegin horixe aitortzea; baita ahal den neurrian laguntzea ere. Nolabait, gure fitxak mugitzea da, aurrerago edo atzerago, Madril eta Paris ere mugitu daitezen. Horretarako modu aunitz dago: ezagutarazi daiteke euskal presoen senide eta adiskideek astebururo pairatzen duten errealitatea; salatu daiteke Espainian ez dela betetzen Europako beste herrialde batean jada betetako kartzela urteak kontatzeko europar doktrina; edota sentiaraz daiteke kartzelan gaixo egotea zein anker eta jasangaitza izan behar duen, ondoan hurbileko lagun eta seniderik gabe.
Bagoaz eta Sareren loturari esker, milaka herritarrek bat egingo dute Madril eta Parisko agintariei eurak ere euskal gizartearengana hurbil daitezela eskatzeko. Frantziako eta Espainiako gobernuetako ordezkariak hurreratu daitezela, euskal herritarren aldarrikapenak ezagutu ditzatela, ibili, eta bide batez, kartzeletako politika birplanteatu dezatela, erbesteratuei euren herrira itzultzen eta, bertan, jazarpenik gabe, bizitzen utz diezaietela... Etor daitezela gurera, ibilbidean parte hartu eta jokabidez aldatu, sakabanaketaren eskurik luzeena deportazioa izan ez dadin. Ibili dabilenak ez baitu goroldiorik bilduko. Gerturatu daitezela, baina batez ere mugi dezatela fitxa, behingoz. Edonork pentsa dezake, eta berekiko esan, fitxak ez daudela gure esku, beraiek dutela giltza. Baina guri iruditzen zaigu baietz, nahiz eta kartzeletako giltzak bi aldeetako agintarien ministerioetan gorde, sarraila mugitzeko ekintza gure esku dagoela, hots, gure eskuek eta aurrerapausoek eragingo diotela giltzari.
Urtarrilaren 9an batera egingo dugu bidea bi hiriburuetan. Bi hiri baina eskaera bakarra: mugarik ez giza eskubideei, konponbideari eta bakeari; gizarte bat bakarra Madrili eta Parisi zuzen eta zorrotz begietara begira, Madrili eta Parisi konpromisoak eskatuz, mugi daitezela exijituz.Bilbon eta Baionan ikusiko dugu elkar. Eta, orduan, gauden tokian gaudela ere, bide berean izango gara, herria ozen aldarrikatzen ari den konponbidearen ibilbidean. Ez ezazu kalerik egin, hor nonbait ikusiko dugu elkar.
Sare Tolosaldeatik, Sarea ehunduz... herri kiroletara!
Sare herritarrak urtebete darama desberdinen arteko borondate eta lana josten euskal preso eta iheslarien eskubideak errespetatuak izan daitezen. Ibilbide eta ideologia ezberdinak dituzten pertsonak elkarrekin lanean bilduz, dispertsioarekin amaitu eta larriki gaixo dauden presoak etxeratzea dugu lehentasuna.
Sarek aurrez aipaturiko helburu hauek helburu zabalago baten baitan kokatzen ditu. Izan ere gatazkaren ondorio guztiei erantzuna emango dion prozesu global bat beharrezkoa dela ulertzen dugu. Prozesu honek deserrian edota espetxean dauden pertsona guztien etxeratzeari bide eman behar dio.
Pertsona guzti hauen giza eskubideen errespetua oinarri izango duen konponbidean pausoak ematen jarraitu behar dugu. Horretarako ezinbestekoa da, eta izango da, norbanako zein maila kolektiboan konpromisoak hartu eta jendartea mobilizatzea.
Bide honetan guztiok gara beharrezko. Herri kirolari, irakasle, musikari, mediku, ikasle, mekanikari, tabernari, epaile, elektrikari, lorezain, abokatu,... guztiok gara beharrezko. Zu ere beharrezko zara. Izan zaitez ehuntzen ari garen Sarearen parte!
Horregatik bihar Villabonan herri kirolariek antolatu duten Herri kiroletara ekimena txalotzearekin batera, eredu hori jarraituz bakoitzak bere esparrutik iniziatiba hartu eta bere ekarpena egin dezan animatzen dugu.
Giza eskubideak. Konponbidea. Bakea.
3, 2, 1... iritsi da ordua!
Adostasunetik konpromisora!
“Free Otegi, Free Them All”
Sarek bat egin du “Free Otegi, Free Them All” leloarekin Donostian larunbatean egingo den manifestazioarekin, beronen eskaera eta izpiritua lotuta dagoelako Saren biltzen diren pertsonek preso, exiliatu eta deportatuen oinarrizko eskubideen alde egiten duen lanarekin eta daukan konpromisoarekin. Izan ere, Sareren iritziz, giza eskubideen errespetua da konponbidea eta benetako bakea erdiesteko funtsezko elementua. Uste dugu, badela garaia hainbat urtetako sufrimenduari amaiera emateko, soilik elkarbizitza eta elkarrekiko errespetuan oinarritutako pausoak emanaz lortuko baita euskal gizarteak gogoz eskatzen eta deseatzen duen bakea.
Beraz Arnaldo Otegi eta gainerako presoak askatzeko eskatzen duen ekimenarekin bat egiten dugu eta larunbatean arratsaldeko 17.30etan hasita Donostian egingo den “Free Otegi, Free Them All” manifestazioan parte hartzeko deia luzatzen diegu herritarrei.
Urtarrilaren 9an, goazen Bilbora eta Baionara!
Konponbidea eta bakearekin lotuta dago Euskal Herriko jendartea. Hala dio SAREko E Baina, ez Madrilek eta Parisek ez dituzte eman gure jendarteak espero zituen urratsak. Are gehiago, euskal presoen eskubide urraketak areagotu egin dira kartzeletan. Horregatik, aurten ere urtarrilaren bederatziko manifestazioan parte hartzeko deia egin du Sarek.
[otw_shortcode_button href="http://info7.naiz.eus/info_i7/20151012/urtarrilaren-9an-goazen-bilbora-eta-baionara" size="medium" bgcolor="#ff4b44" icon_type="general foundicon-mic" icon_position="left" shape="square" text_color="#fff" target="_blank"]Entzun[/otw_shortcode_button]
Egilea: Info 7 irratia
Urtarrilaren 9an Baionan eta Bilbon konponbideranzko urratsak ematera goaz
Bagoaz eta Sarek elkarrekin eskatuko dugu, urtarrilaren 9an Bilbon eta Baionan, euskal preso, exiliatu eta deportatuen oinarrizko eskubideen defentsa.
Preso, iheslari eta deportatuen giza eskubideen zaintzaren inguruan dihardugun Sare-k eta Bagoaz-ek bat egin dugu, elkarrekin, urtarrilaren 9an, Bilbon eta Baionan, presoen sakabanaketaren zein aplikatzen zaizkien beste salbuespeneko neurrien indargabetzea eskatzeko. Biak ala biak, indartsu ari gara lanean giza eskubideen, gatazkaren konponbideen eta bakearen alde, eta horretarako pentsaera, ideologi eta arlo ezberdinetako hainbat lagun elkartu ditugu geure baitan. Orain, biek batera, elkarrekin burutuko dugu presoen etxeratzearen aldeko mobilizazioa.
Donostian Aieteko jauregian, Bakearen eta Giza Eskubidearen Etxean, jakinarazi dugu prentsaren aurrean ondorengo hilabeteotan elkarrekin lan egingo dugula, gatazkaren konponbide eta bakearen alde, gizartean gero eta zabalduago dagoen aldarrikapen eta konpromiso horren aldeko urratsak emateko. Sareren eta Bagoaz-en iritziz, ETAk su-etena iragarri zuenetik, gatazka gainditu eta konponbidean aurrera egiteko aukera ona izan da. “Tamalez, Madril eta Pariseko gobernuek Aieteko adierazpenari eman dioten erantzuna ez da euskal gizarteak, oro har, espero zuena izan”.
Prentsaurrekoan orain arte euskal gizartean giza eskubideen, konponbidearen eta bakearen alde eman diren hainbat urrats aipatu ditugu, besteak beste, Foro Soziala, “Zuzen Bidean” Jaurlaritzaren proposamena, euskal preso eta exiliatu politikoen ekarpenak, Baionako (2014) eta Pariseko (2015) adierazpenak, eta, aldi berean, Christiane Taubira, Justiziako frantziar ministrak presoak Akitaniako kartzeletara hurbiltzeko aukerari buruz esandakoak nabarmendu dituzte.
Bagoaz eta Sareko ordezkariok adierazi dugu egoeran aldaketa espero dugula, hau da, itxaropen giroa nagusitu dadila orain arteko liskar, istilu, gorroto eta mendekuaren aurrean… soilik bide horretatik gaindituko baita espainiar eta frantziar gobernuen etengabeko blokeoa, eta lortuko dugu preso nahiz iheslariak etxeratzea.
Geure egin dugu Sarek eta Bagoazek euskal jendartean giza eskubideekiko den begirunea eta urtarrilaren 9an Baiona eta Bilbon burutuko diren mobilizazioetan kartzeletako politiketan aldaketak eskatuko ditugu, ez beste munduko ezer, egun indarrean diren legedi eta arauak, salbuespenik gabe aplikatzea, soilik; horrek asko erraztuko bailuke konponbidea eta bakea. Konkretuki, zera aldarrikatuko dugu, euskal presoen sakabanaketarekin amaitzeko, larriki gaixo dauden presoak askatzeko, betirako kartzelara kondenatzen dituen salbuespenezko legedia indargabetzeko eta Europako legediaren aurkako norabidean legearen urratze edo interpretazio okerrak uzteko. “Horren adibide argi eta garbia da, beste estatu batzuetan jada betetako zigorrak, hemen kontuan ez hartzea”.
Prentsaren aurrean argi adierazi dugunez, urtarrilaren 9an Bilbon eta Baionan arratsaldeko 17:00etan deitutako mobilizazioetan hainbat herritarrek bat egitea espero dugu, “izan ere, asko gara, ideologia politiko bat ala bestea izanda ere, preso daudenen giza eskubideen alde gaudenak”.
[otw_shortcode_button href=”http://sare.eus/wp-content/uploads/2015/10/manifestua-u9.pdf” size=”medium” bgcolor=”#ff4b44″ icon_type=”general foundicon-page” icon_position=”left” shape=”square” text_color=”#fff” target=”_blank”]Akordioa jeitsi[/otw_shortcode_button]
Prentsan bildutakoa
Berria
Euskal presoen aldeko mobilizazioak antolatu dituzte Bilbon eta Baionan urtarrilaren 9rako.
Sare eta Bagoaz elkarteek egin dute bi manifestazioetarako deialdia. Sakabanaketa amaitzeko, gaixo larriak askatzeko, baldintzapeko askatasuna aplikatzeko eta “salbuespen legea” gainditzeko eskatuko dute, 17:00etan, Bilbon eta Baionan. Bi elkarteek “batasun estrategikorako ahalegina” izenpetu dute preso eta iheslarien eskubideen alde egiteko.
Kazeta
Euskal presoen aldeko manifestazioak antolatuko dituzte urtarrilaren 9an Baionan eta Bilbon.
Bagoaz eta Sare mugimenduek euskal presoen aldeko manifestazioak antolatuko dituzte urtarrilaren 9an Baionan eta Bilbon. Bi mobilizazioak ordu berdinean eta helburu berdinen alde prestatuko dira: dispertsioaren bukaera, gaixorik diren presoen askatasuna eta baldintzapeko askatasunen aplikazioa.
Diario Vasco
Sare y Bagoaz firman un acuerdo para dar pasos juntos.
Los colectivos han organizado dos manifestaciones, una en Bilbao y otra en Baiona, el 9 de enero en busca del fin de la dispersión de los presos vascos y la libertad de los presos gravemente enfermos.
Naiz
Sare y Bagoaz reclamarán el 9 de enero en Bilbo y Baiona el respeto a los derechos de los presos.
Ambos colectivos han convocado dos manifestaciones para reclamar el fin de la dispersión en las cárceles españolas y francesas, así como la desaparición de otras medidas excepcionales que se les aplican.
Ahotsa.info
Euskal presoen aldeko mobilizazioak antolatu dituzte Bilbon eta Baionan urtarrilaren 9rako.
Sare eta Bagoaz elkarteek egin dute bi manifestazioetarako deialdia. Sakabanaketa amaitzeko, gaixo larriak askatzeko, baldintzapeko askatasuna aplikatzeko eta “salbuespen legea” gainditzeko eskatuko dute, 17:00etan, Bilbon eta Baionan. Bi elkarteek “batasun estrategikorako ahalegina” izenpetu dute preso eta iheslarien eskubideen alde egiteko.
Etb
Sare eta Bagoaz bat eginda aterako dira kalera urtarrilaren 9an.
“Presoen oinarrizko eskubideen errespetua” aldarrikatuko dute; besteak beste, gaixorik dauden presoak libre geratzea.
Topatu.info
Urtarrilaren 9an euskal presoen eskubideen aldeko mobilizatzera deitu dute, Baionan eta Bilbon.
Euskal preso, iheslari eta deportatuen giza eskubideen zaintzaren inguruan diharduten Sare eta Bagoaz elkarteek elkarrekin egingo dute kolektibo horien oinarrizko eskubideen defentsa. Baionan eta Bilbon deitu dute mobilizatzera, 17:00etan. Presoen sakabanaketa zein aplikatzen zaizkien beste salbuespeneko neurriak indargabetzea eskatuko dute.
Babes zabala Aitzol Gogorza, larriki gaixorik dagoen preso errenterriarra jasotzen ari dena
Zenbait erakunde eta ordezkari politikok eskatu du azken egunotan kartzelan larriki gaixo den errenteriarra askatzeko.
Aurreko larunbatean Errenteria Oreretako ordezkari politikoek bat egin zuten Aitzol Gogorzaren askatasuna aldarrikatzeko. Astelehenean, aldiz, Gasteizko parlamentuak egin zuen gaixotasun larria duen presoa askatzeko eskaera.
Aitzol Gogorza oso larri dago Basauriko kartzelan. Nahasmendu obsesibo konpultsiboa du, sintoma psikotikoekin nahastuta. Espetxean egoteak are eta gehiago okertu du bere osasun egoera. Izan ere, gaixotasunaren kontrol zorrotza zein hurbileko senide eta adiskideen laguntza behar beharrezkoak dira horrelako gaitzei egoki aurre egiteko.