Orain Presoak dinamikaren baitan larunbat honetan antolatu den manifestazioan parte hartzeko azken deia luzatu, Bilboko manifestazioaren nondik norakoak azaldu eta balorazio politikoa egin dute Arantza Aldezabal eta Joseba Azkarragak Bilboko La Bolsan, antolatze lanetan dabilen taldekide batzuen azken bilera teknikoaren ostean.

Azkarraga eta Aldezabalek bi puntu jorratu dituzte prentsaurrean:
Lehenik, azken hilabeteetako balorazio politikoa.
Bigarrenik, larunbateko antolaketari dagozkion xehetasun garrantzitsu batzuk.

Irakurketa politikoa:
Lehen puntuari dagokionez, 2018a Euskal Herriaren bake-prozesuaren bidean bereziki garrantzitsua izan dela azpimarratu dute: “aurreko maiatzean, gure herrian urte luzez min eta sufrimendua sortarazi duen indarkerietako bat behin betirako desagertu zen. Kanboko ekitaldi historiko hartan, herritar askok eta askok garai ilun bati amaiera eman zitzaiola sentitu genuen, baina jakitun izanik horrekin ez zela sufrimendu guztiarekin amaituko eta oraindik bide luzea dugula aurretik bizikidetza baketsu iraunkor bat lortzeko”.

2019a, beraz, itxaropenaren urtea dela azaldu dute, baina baita kezka adierazi ere “orain arteko aldaketa txikiak ikusita, eta aldaketa horien erritmoa ikusita, zuhurtzia eta ezjakintasunen urtea” izaten hasi dela esanaz. Horrekin batera, pasaden urtean eginiko lanaren ondorioz aurrera urratsak eman direla azpimarratu dute, adibide gisa Gasteiz zein Iruñeko Legebiltzarretan lortutako akordioak gogora ekarriz. Baina “tamalez”, aurreko abuztuan Gobernu sozialistaren ahotik entzundako “espetxe politika berriaren inguruko mezu itxaropentsu horiek, oraingoz errealitatean hitzetan besterik ez dira geratu”.

Bestalde, larunbateko manifestazioan parte hartzeko asmoa adierazi duten alderdi politikoei, eta baita sindikatu, eragile sozial eta norbanako guztiei, eskerrak eman nahi izan dizkiete eta baita “errespetu eta begirunea adierazi” bertan ez egotea erabaki duten horiei. Izan ere, “mobilizazioan egongo ez diren arren, badakigu egungo espetxe-politikaren aldaketaren alde daudela, goian aipatu ditugun akordio instituzionalak horren lekuko izanik, eta hori da garrantzitsuena” dinamikako kideentzat. Eta beraz, mobilizazioan parte hartzearen erabakia norberaren esku geratzen dela gogorarazi dute: “gutako bakoitzak, pertsona, herritar bezala, gai honen inguruan gogoeta egin eta barruak eskatzen diona egin dezala”.

“Emozioak sentitu eta esker oneko keinu eta begiradak jaso nahi badituzue ETORRI, zalantzarik gabe” esan du Aldezabalek eta aldiz, larunbata arratsaldean bere etxean geratzea erabaki duen pertsona horri, “eskatuko genioke enpatia-ariketa bat egitea eta une batez, laburra bada ere, euskal presoen senide hauen larrutan jartzea, imajinatuz nolakoa den euren sufrimendua”.

Horrez gain, alderdi politikoei zera adierazi nahi izan diete, “hauteskunde-giroan murgilduta dauden bitartean, ez dezatela presoen egoera kezkagarri hau euren arteko ika-mikak edo desadostasunak elikatzeko tresna gisa erabili”, eta euren arteko akordioen agendaren lehentasunezko gaia izan dadila, “eskubideez hitz egiten ari garelako, eta hauen barnean, giza eskubideez, hauek betearazteko konpromiso eta bermean baitatza demokrazian bizitzea”.

Puntu honekin amaitzeko, Gasteizko Legebiltzarrean Estatus berriaren testua idazten ari den lan-talde horri eskari berezi bat luzatu diote: eskubideen errekonozimenduaren bidean, salto kualitatiboa emateko garaia dela sinistuta, euskal presoen eskubide hauek ere jasota gera daitezen testuan.

Antolaketaren xehetasunak:

• 11:00 La Bolsan goizeko deklarazioak prentsaurrean

• 11:30 mahaingurua: Bel Pozueta (Adur Ramirez de Alda preso gazte altsasuarraren ama) + Laura Masvidal (Quim Forn Kataluniako presoaren bikotekidea) + Maider Viso (Harrieta Iragi euskal presoaren bikotekidea). Joseba Azkarraga moderatzaile.

• 16:00 Gonbidatuen harrera Hotel Silken Indautxun. Zuzenean emitituko da gure sareetatik, eta aukera emango zaio nahi duen guztiari (komunikabide, blogari, eta bestelako plataforma digitalei) esteka hartu eta zuzenean emateko. Emisio honetan ordezkari politiko, sindikal eta sozial desberdinen deklarazioak ere emango dira, bai hoteleko harrerari dagozkionak eta bai manifestazioan bertan egingo direnak.

• 17:00 manifestazioaren hasiera La Casillan

• 17:30-18:00 manifestazioa gelditu eta deklarazioak Zabalburun

• 18:30-19:00 Ekitaldia Udaletxean

Dakizuen moduan Orain Presoak dinamikako kideok eta Bakegileak datorren larunbatean Bilbo eta Baionako kaleak beteko dituen manifestaziorako deia egin genuen duela hilabete batzuk. Gaur, Bidasoaren bi aldeetan agertu gara prentsa aurrean, manifestazioaren inguruko hainbat xehetasun emateko.

Irunen egin genuen agerraldian, aurreko urriaren 20ean Donostiako kaleak zeharkatu zituen manifestazio anitz eta zabalaren ostean, Orain Presoak dinamika eta iparraldean Bakegileek aurrera eramandako dinamikak batu eta urtarrilean egingo den manifestaziorako deia luzatu genuen. Asmoa argia da, elkarbizitza eta bakerako ezinbestekoa zaigun presoen arazoari irtenbidea emateko, ezberdinen arteko elkarrekintza oinarri, gizarte zibila aktibatzea. Bake iraunkor integral baterako oinarriak gizartearen aktibaziotik etorri behar baitira eta horrek denon ardura eta ahalegina behar du.

Izan ere, Irunen esan genuen moduan, garai berri baten aurrean aurkitzen gara, urte luzeetan ezinezko izan ditugun aukera berriak zabaldu dizkigun garai berri baten aurrean, eta jendarte bezala aurrera egiteko probestu beharra dugu. Horretarako baina, bakoitzaren bizipen, min edota ideologiak albo batera utzi gabe, elkartzen gaituen horretan jarri behar dugu indarra, behin betikoz sufrimendu ororen sorrerarekin amaitu ahal izateko.

Batasun hau da, hain zuzen ere, datorren asteko manifestazioan agertu nahi genukeena eta bide horretan, urriaren 20ari begira egin genuen moduan, oraingoan ere norbanako, sindikatu, alderdi eta eragileei bertaratzeko gonbidapena luzatu diegu. Miramar Jauregian elkarbizitzaren alde eginiko ekitaldia eredu hartuta, arratsaldeko 16:00etan Silken Indautxu Hotelean gonbidatuentzako harrera txiki bat egingo dugu, ostean guztiok batera manifestazio burura gerturatzeko.

Gonbidapenei dagokionean, gaurkoan, lehenekoz, Bilboko manifestazio honetan sindikalgintza osoaren ordezkaritza izango dugula nabarmendu nahi dugu. Sindikatuekin batera, Donostiako manifestazioan egin moduan, beste eragile zein alderdi politikoei ere parte hartzera gonbitea luzatzen diegu, guztiok baikara beharrezkoak. Alor instituzionalean lortutako espetxe politikaren aldaketa eskatzeko adostasunek egin bezala, gizarte zibil osoa batu behar dugu Bilbo eta Baionan, horregatik alderdi eta instituzioetako kidego osoari luzatzen diegu bertaratzeko gonbitea.

Honekin batera, jakinarazi nahi dizuegu ere Herrialde Katalanetatik ordezkaritza politikoa ez ezik, preso diren politikarien senideak ere manifestazioan izango direla.

Azkenik, eta azken hilabeteetan Orain Presoak dinamikaren baitan egin dugun moduan, alor ezberdinetan lanean ari diren berrehundik gora norbanakoren atxikimenduak batzen aritu gara eta, guztiak datorren larunbateko manifestazioan egon ezin izango diren arren, bakoitzak emandako urratsa eskertu eta txalotu nahi dugu.

Beraz, Baionan eta Bilbon batuko gara datorren astean, elkarbizitzan bizitzeko dugun nahia eta bakerako dugun desira oinarri, etorkizun hobe bati ateak zabaltzeko. Baina baita, espainiar eta frantziar estatuei oraindik bake justu eta iraunkor baterako baldintzak ez direla bete esateko, horretarako, espetxe politika honekin amaitzea behar beharrezkoa baita.

Inor atzean utzi gabe, aurrera egin nahi dugu. Horregatik, gaurko azken hitzak ere, datorren larunbatean Bilbon eta Baionan egingo den manifestaziora herritar oro gonbidatzeko probestu nahi dugu. Urtarrilak 12, larunbata, arratsaldeko 17:00etan Bilboko La Casilla edo Baionako Errepublika plazan elkartuko gara.

>> atxikimenduak_Urtarrilak 12 

Gaur hemen, gizarte zibila ordezkatzen dugun alor ezberdinetan lanean gabiltzan hainbat lagun batu gara. Gutako bakoitzak bere bizipen eta ideiak ditu, baina bada elkartzen gaituenik ere; elkar bizitzeko nahia eta bakerako desira. Etorkizun hobe bat eraiki nahi dugu eta horretarako, sufrimendua sortzeari utzi behar diogu. Zauri irekiak itxi eta mina sortzen jarraitzen duten korapiloak askatu behar ditugu.

Horretarako sortu genuen Orain Presoak dinamika. Elkarbizitzaren eta bakearen alde lan egin eta elkar batzea helburu duena. Bide horretan, ezinbestekotzat jotzen dugu, euskal preso eta senideen eskubidea urratzen dituen espetxe politikarekin amaitzea. Etorkizunari begira ezberdinen arteko zubiak eraikitzea beharrezkoa dela ustea dugu. Bake iraunkor integral baterako oinarriak gizartearen aktibaziotik etorri behar baitira eta horrek denon ardura eta
ahalegina behar du.

Horregatik diogu bakegintza eta elkarbizitzaren bidean, orain espetxe politikaren arazoari irtenbidea emateko unea dela. Eta horixe da urtarrilaren 12an Bilbon eta Baionan egingo dugun aldarria eta gaur hemen batu garenok zabaldu nahi dugun deia. Izan ere, eta aurrera urratsak ematen hasiak bagara ere, gaur gaurkoz ez dira bake justu eta iraunkor baterako baldintzak bete.

Bakearen bidea alde guztien eginkizuna da: jendartearena bere aniztasunean, elkarteena, instituzioena eta estatuena. Aktore guztien eginkizuna da eta horregatik, gu gaur hemen batu garen moduan, urtarrilaren 12an ere jendarte osoari eta baita, herri ordezkariei, eragileei, alderi eta sindikatuei, Bilboko eta Baionako kaleetan gurekin batera etorkizun berri baten alde urratsak ematera gonbidatu nahi ditugu.

Iraganaz ezer baztertu eta ahaztu gabe, egin behar dugu bidea. Indarkeria guztien biktima guztiei zor diegu egia, errespetua eta errekonozimendua. Zor diegu iragana ez errepikatzea, eta, horretarako lan egitea, edozein izanik ere gure arteko ezadostasuna.

Aspaldiko urteetan posible izan ez zen elkarbizitza, azkenean posible ikusten da gure herrian. Orain arte batu ahal izan ez garenen ariketa kolektiboa izango da.

Urtarraileran 12an batu gaitezen guztiok Bilbon eta Baionan

>> Bizkaia_ atxikimenduak _ Bizkaia_adhesiones

Pasa de abenduaren 28 eta 29an Iruñeko Sarasate pasealekuan “Begirada bat barrutik” ekimenean parte hartu eta ekimenean beste mila modutara lagundu zuten guztiei gure esker eta zorionak helarazi nahi dizkiogu.

Elkarbizitzarako, konponbiderako eta bakerako bidean oraindik lan asko daukagu egiteko. Guk bide horretan lanean jarraituko dugu, gizarte osoaren ardura delako errespetuan oinarritutako jendarte bat eraikitzea. Arlo desberdinetan eman behar dira aurrera pausoak, iragana kontuan izanik etorkizuna eraiki behar dugu, eta hori guztion artean, elkarrekin, egin behar dugula uste dugu.

Badakigu ez dela lan erreza, eta tamalez gertakari batzuek erakutsi digute oraindik elkar ulertzeko, errespetatzeko, bide bat egiteke daukagula. Gu, orain arte egin bezala, jendarte osoari zuzentzen gara, guztiekiko errespetuz, are gehiago sufrimendua pairatu dutenekiko.

Honekin batera, nafar jendarte osoari dei egiten diogu, datorren urtarrilaren 12an, pauso bat eman eta Bilbo eta Baionako kaleak betetzeko. Sufrikario guztiekin amaitu behar delako, orain da presoen egoera aldatzeko unea, Orain Presoak.

Gaur Gasteizen Araba mailako arlo ezberdinetako pertsonak batu dira Orain Presoak dinamikaren baitan, gizarte zibilari urtarrilaren 12ko manifestaziora deia luzatzeko. Ciudad de Vitoria Hotelean elkartu dira, eta bertan Ane Guevara ipuin kontalariak eta Juan Ibarrondo idazleak Irunen dinamikako kideek eta Bakegileek urtarrilak 12rako deialdia egitean irakurritako deklarazioa irakurri diete bertaratutako kideei eta euren atxikimendua adierazi duten norbanakoen zerrenda jakitera eman dute.

Guevara eta Ibarrondok gogorarazi dute ezberdinen arteko batasunean dagoela dinamika honen oinarria eta espetxe politika aldatu eta elkarbizitzaren eta bakearen bidean aurrera urratsak emateko giltza.

ATXIKIMENDUAK/ADHESIONES