Albisteak

ORAIN PRESOAK dinamikaren baitan, bizikleta martxaren antolatu dugu Uztailaren 20tik 23ra

Prentsa agerraldi honetan honako hau adieraztea da gure xedea: gaurkoan ez gatoz SAREk abiatu nahi duen ekimenaren berri ematera soilik; etorkizunean, eta lehenbailehen bada hobe, euskal presoen egoerari loturik gerta daitezkeen mugimenduen inguruko gure balorazioa zabaltzera baizik.

Lehenik eta behin, eta gure ekimenekin loturik, “bizikleta martxaren” aipamena egin beharra dugu. ORAIN PRESOAK dinamikaren barruan, uztailean gauzatuko baitugu martxa hau.

ORAIN PRESOAK dinamikaren baitan, bizikleta martxaren aurkezpena
Datorren uztailaren 20an, Mont d’Marsan espetxetik abiatu eta Zaballako espetxean amaituko den bizikleta martxari hasiera emango diogu. Ekimen honen bitartez, une honetan euskal presoei egozten zaien salbuespen egoerarekin amaitu beharra dagoela aldarrikatu nahi dugu; urrunketa politikak zuzen-zuzenean senideen kolektiboan eragiten duen sufrimendua nabarmenduz.

Frantziar estatuan hasiko da ekimena, frantziar gobernuak gai honekiko aldaketarako duen borondatea erakutsi baitu, eta beraz, erreferentzia argia bihurtu da zentzu horretan.
Bertan frogatu da, beste behin ere, gizarte zibilaren lanaren garrantzia; gizarte zibilak lortu baitu frantziar gobernuak frantziar estatuan dauden euskal presoei dagozkien baldintzak aldatzeko beharrezko urratsak ematen hastea.
Zalantzarik gabe, jarraitu beharreko eredu argia da. Lan lerro hori jarraituz, gizarte zibilaren eta adostasun sozialaren bultzadaz, dugun babes instituzional eta sindikala kontuan izanik, espainiar estatuan ere bide horretan urratsak ematen has daitezen lortu beharra dugu.
Bizikleta martxa edo bira hau 4 etapatan gauzatuko da: 1) Mont d’Marsanetik Baionara, 2) Baionatik Donostiara, 3) Donostiatik Altsasura, eta azkenik, 4) uztailaren 23an Zaballara, gaur hemen elkartu garen Gasteizko plaza honetatik igaroko delarik martxa.
Beraz, martxa sinboliko honetaz baliatuz, Mont d’Marsan eta Zaballa lotu nahi izan ditugu; Zaballa espetxe politikaren aldaketaren ikur bihurtzea nahi dugulako.
Hori dela eta, gaurko agerraldi honekin bertan parte hartzeko deia luzatu nahi dizuegu.
Martxa honen inguruko xehetasun edota informazio gehiago jakin nahi izanez gero, gure webgunean sartzeko gonbita egiten dizuegu. Webgunean bertan baitago euskal presoak hurbiltzea ezinbestekoa dela aldarrikatzen duen martxan izena emateko txantiloia.

> Izena emateko: http://sare.eus/bizikleta-itzulia/

Azken asteen balorazioa eta espetxe politikaren inguruko deklarazioa
Sareren ikuspegitik, urtarrilean Bilbon gauzatu genuen manifestazioaz geroztik, igaro dira sei hilabete, eta gure ustez, positiboa izan da euskal presoei egozten zaien salbuespen politika honekin amaitzeko aldarrikapena:

  • Maila sindikal zein instituzionalean akordio bateratuak erdietsi dira; bai diputazio eta Nafarroako Parlamentuan, eta baita eusko parlamentuan ere, alderdi popularra izan ezik, gainontzeko alderdi politiko guztien oniritzia lortu da, bai behintzat salbuespen politikaren amaierari dagokionez.
  • Abenduan, Iparraldean gizarte zibilak bultzatutako dinamika baten baitan, Bake Artisauen izenpean, ORAIN PRESOAK lemapean manifestazio jendetsua gauzatu zen Parisen. Bertan ordezkaritza anitza izan zen, bai instituzionalki eta baita Frantziako zein Iparraldeko hainbat mugimendu politikoren eskutik ere.
  • Urtarrilean, berriz, Bilboko kaleak bete genituen; 100 000 lagun elkartu baikinen aho batez salbuespen legediarekin amaitu eta bakearen alde ekiteko.
  • Maiatzean, aldiz, ETAren erabaki historikoaren berri izan genuen, erabaki horrek, jakina, aro itxaropentsu bat zabaldu zuen. Argi eta garbi diogu, erabaki hori ezin izango zela gauzatu gizarte zibilak parte hartu izan ez balu. Hau da, Bake Artisauen lana ezinbestekoa izan zen bai armagabetzean, eta baita ETAren amaieran ere.
  • Eta duela aste gutxi, garai berri honi erantzunez, Gizarte Zibileko 46 pertsonek gizarte zibilaren aktibazioari zuzenduriko dinamika aurkeztu zuten, baita hemen ere, Hegoaldean, ORAIN PRESOAK dinamika. Modu horretan Pirinioen beste aldeko kideen eredua jarraitu nahi izan dugularik.
  • Ezinbestean, azken egunetan espetxe politikan izango diren aldaketen inguruko zenbait deklarazio direla-eta, horiei erreferentzia egin beharrean gaude. Horien guztien artean, nabarmendu beharrekoa da, nork egin dituen ikusita, espainiar Gobernuko Presidente berria den Pedro Sanchezen aipamena, alegia. Ezbairik gabe, zuhurtziaz jokatu beharrean gaude, balorazio positiboa egiten dugu, lehen aldiz, espainiar Gobernuko Presidenteak ozen adierazi baitu urte luzeetan aldarrikatu duguna. Sanchezen espetxe politika aldatzeko nahitasun hori, jakina, gizarteak eta euskal sindikatuek hainbestetan aldarrikatu izanaren ondorio da. Ezinbestekoa den urratsa litzateke konponbide eta bakearen bidean. Zentzu honetan, Espainiako Gobernuko Presidenteak eginiko eskaera partekatu nahi diegu gainontzeko alderdiei ere, ez dezaten alderdi-interesak jaurtitzeko arma gisa baliatu. Orain eta gaur asmatzea denok dugun betebeharra da. Inork ere ezin du ertz batetik begira geratu, edota alderdiko interesengatik elkarbizitzarantz egin beharreko bidea oztopatu. GIZA ESKUBIDEEZ ari gara, barne zein europar legedia betearazteaz ari gara.
  • Horregatik guztiagatik, Sarek adierazpen horiek bereziki positibotzat jotzen ditu, eta espero dugu espetxe politikan aipaturiko aldaketa horiek lehenbailehen gauzatzea, beti ere konponbidearen bidean urratsak eman ditzagun eta giza eskubideen errespetuan oinarrituz, sekula suertatu behar ez lukeen salbuespen politika batekin amaitzeko xedez.
  • Honenbestez, guk ulertzen dugunez, espetxe politikaren barruan gainditu beharreko alderdiak ez lirateke soilik urrunketa politikari dagozkionak.
  • Bereziki azpimarratu nahi genuke segidan aipatuko duguna. Zinez lehentasuna duten honako lau alderdi hauei konponbidea emateko beharra dugu:
    • Larriki gaixorik dauden euskal presoek pairatzen duten egoera jasanezina da, bizitzeko eskubidea eta osasunerako eskubidea edonork duela kontuan izanik.
      Lehen gradu ezarpenaren amaiera, lehen gradua baita salbuespen politikaren eta giza eskubideen urraketaren bermatzailea.
      Salbuespen legediaren indargabetzea.
      Beste estatu batean aurrez betetako zigorren kontaketa europar legediak eskatu bezala egin beharra.
  • Bide horretan, espetxe eremuari dagokionez, Espetxe instituzioko Zuzendari Nagusi berriaren eta Justizia arduradun berriaren esku dago giza eskubideen inguruko paradigma berritzailea gauzatzea.
  • Eta zabaldu berri den itxaropen garai honetan, Eusko Jaurlaritzatik eratorritako aldarrikapenei dagokienez, gure desadostasuna azalerazteko beharra dugu. Errespetuz. Uste osoa dugu modu bateratuan lan egitea beharrezkoa dela, baina baita desberdintasunean ere.
  • Entzun eta irakurri dugunaren arabera, Gobernu berriari ere helarazi nahi genioke, PPko Gobernuari egin zitzaion proposamen berbera. Hau da, euskal presoak Euskal Herritik 250km-ra hurbiltzeko proposamena. Gure galdera, ordea, honako hau da: eta zergatik ez EAE eta Nafarroako espetxeetara? Zergatik ez 0km-ra?

Proposamen horrek oraindik ere Euskal Herriko espetxeetan egon beharko luketen presoen eskubide urraketa dakar, eta baita euren senide eta lagunena ere; izan ere, 500km-ko bidaiak egiten jarraitu beharko bailukete astebururo.

Beraz, Eusko Jaurlaritzari proposamen hori berrikus dezala eskatu nahi diogu.

Espetxe eskuduntzen transferentziekin batera, Epaitegiek konpetentzien gertutasuna lortzea. Honela, elkarrekin lan egiteko aukera izan dezagun, ez soilik euskal presoek euren zigorra etxetik gertu betetzeko, Espetxe legediak berak adierazten duen bezala; baizik eta urrunketarekin batera, ez ditzagun ahaztu aurrez aipamena egindako beste larritasunak ere. Erronka edota helburu horietan lan egiteko, SAREk elkarlanean eta modu bateratuan lan egiteko bere prestutasun osoa azaltzen du.

Ez genuke amaitu nahi SAREk duen konpromisoa berretsi gabe, zentzu horretan aurkeztu dugu ORAIN PRESOAK dinamika, ekainaren 2an Bilbon iragarri bezala. SAREk gizarte zibilaren aktibazioa du xede, eta baita gizarte zibil horri ahotsa ematea ere. Guztion artean aurrera urratsak emateko aukerez baliatzeko garaia da, eta ezinbestekoa da eskuartean dugun aukera paregabeaz baliatzea, etorkizuneko gizarte adiskidetsu eta baketsua eraikitzeko.

ORAIN PRESOAK, “slogan” hutsa baino gehiago da. Milaka eta milaka herritarren garrasi isila da, ez dadin 2011ko urrian abiatutako garai berri eta itxaropentsua zapuztu, gerora urrats garrantzitsuak eman dira: esaterako, 2017ko apirilean eta 2018ko maiatzean.

Hori dela eta, Sarek hitza ematen du bere ahalegin guztia egingo duela Euskal Herriko herri guztietara dinamika hau ailegatu dadin. Honela, geroz eta gizarte zibileko herritar gehiago izango gara ekimen hau bere egin eta dinamikaren parte izango garenak. Datozen belaunaldientzat sufrimendurik gabeko etorkizuna izan dezagun, elkarbizitza eraikiz.

by sarenaiz

EKAINAK 2ko IRAKURKETA, ORAIN PRESOAK

Une berri baten aurrean gaude. Maiatzean konponbidearen aldeko aurrera pausu berri bat eman da. Saretik urrats honi dagokion garrantzia eman behar zaiola uste dugu eta ireki den aukera berria orain artean gure aldarri eta helburu izan diren giza eskubideen defentsa, konponbidea eta bakea behin betikoz eskuratzeko probestea.

Irekitako aukera berri honen aurrean, ulertezina da oraindik orain, hainbat herritarren giza eskubideak urratuak izaten jarraitzea. Baina hala da, izan ere, euskal presoek bizi duten salbuespen egoera bere horretan mantentzeko hautuak, giza eskubideen urraketan sakontzea baino ez dakar.

Gero eta gehiago gara espetxe politika honek aldaketak behar dituela pentsatzen dugunak, pixkanaka-pixkanaka aldaketaren aldeko ahotsak handitzen doaz. eta geroz eta gehiago eta anitzagoak dira espetxe politika bat aldatzea eskatzen duten ahotsak. Euskal jendartearen gehiengoak argi du, orain ahots guzti horiek aktibatzea izango da gure apustua.

Bide horretatik, iparraldetik, iritsi zaigu lan egiteko era eta ilusio berri bat. Gizarte zibilak armagabetzea eta disoluzioa ahalbidetu ditu eta egun Frantzian aurkitzen diren euskal presoen baldintzak aldatzen hasi daitezen ere lortu du. Hau, jendarte osoaren parte hartzearekin bakarrik izan da posible.

Eta bide hori jarraitu nahi dugu hemen ere, aurreko maiatzaren 3aren ondotik, presoen auziari aterabide bat emateko unean gaude, eta horretarako gizarte zibilaren parte hartzea beharrezkoa da, gizarte zibilaren unea da.

Guztiak hemen ez egon arren, gaur hemen, gizarte zibila ordezka dezakeen norbanakoen talde bat bildu da. Gizarte zibilaren garaia delako, eta SAREk, gizarte zibilarekin batera aktibaziora jotzen duelako.

Beraz, beraiena da hitza.

Irakurketa:

Dagoeneko inork ezin uka dezake: konponbiderako, elkarbizitzarako eta bakerako unea da. Pasa den maiatzaren 4an bizitako egun historikoaren ostean, parez pare ireki zaigu hainbeste sufrimendu sortarazi duen ziklo luze honi amaiera emateko aukera, elkarrekin lan eginez, elkarri begiratuz, elkarri entzunez, ditugun adostasunei lehentasuna emanez eta elkarrekin bidea eginez.

Etorkizunari begira jarri nahi dugu, eta horretarako iraganetik datozen oinaze eta min guztiak sendatzea ezinbestekoa da. Bide honetan izan diren eta diren biktima guztiek merezi dute egia, memoria eta erreparazioa. Norabide horretan sakondu behar dugu. Herritar gisa, guztioi dagokigu ardura hau geure egitea, guztiok merezi baitugu elkarbizitzan eta bakean oinarritutako jendarte batean bizitzea.

Oraindik bada, ordea, sufrimendua sortzen jarraitzen duen auzi bat, askatu beharreko korapilo bat. Hain zuzen ere, gaur hemen batu gaituena. Egun, jadanik ETAk existitzeari utzi dion arren, 282 euskal preso daude euren senideengandik ehunka edo milaka kilometrora urrunduak. Espetxean dauden pertsona hauek euren eskubideen jabe izan arren, oraindik ere salbuespen- neurriak ezartzen zaizkie, Espainiako zein Europako legedien aurka doazenak, eta, presoa ez ezik, senideak, bereziki haurrak eta adin nagusiko pertsonak ere zigortzen dituztenak.

Bakean eta adiskidetuta bizi den jendarte batekin amesten dugunok giza eskubideen errespetuak batzen gaitu. Jakin badakigu adiskidetzea prozesu konplexu bezain beharrezkoa dela, urratsez urrats eraikitzen joango dena. Zentzu honetan, egungo espetxe-politika aldatzea ezinbestekotzat jotzen dugu, eta horretarako behar beharrezkoa da guztion bultzada eta konpromisoa.

Lau lehentasun hauek dira, bereziki, lehen bait lehen konpondu beharrekoak:

  • Urruntzea. Asteburu oroz ehunka senide ehunka kilometro egitera behartzen dituena.

  • Larriki gaixo dauden presoak. Egun gutxiko bizia geratu aurretik, gaixorik dauden presoek behar bezala artatzeko eskubidea dute, hemen eta orain.

  • Europako Legediak dioen moduan, bi estatutako zigorren batuketaren aplikazioa.

  • Lehen Graduen aldaketa. Euskal presoek, lehen graduan betetzen dute zigorraren %100, eta hori legearen kontra doa.

Espetxe-politika hau iraganean kateatuta dago eta ez-ohiko lege batean oinarritzen da. Guk etorkizunera begira jartzeko garaia dela uste dugu. Gure ondorengoentzat guri aurrekoek utzi zigutena baino etorkizun hobea eraikitzeko aukera dugu esku artean. ETA desagertu den honetan, ez dugu sufrimendu gehiago sortzen duen politikarik nahi.

Korapiloak askatzeko unea da. ORAIN. Elkarbizitzarako unea. Urteetan sortutako gizarte-arrakalak elkarrekin sendatzeko unea. ORAIN. Batu ezin izan garenok batzeko unea da. Orain presoen auzia konpontzeko unea da.

Gaur hemen batu garenok ORAIN PRESOAK dinamika jarri dugu martxan, eta guztioi dei egiten dizuegu, gure ametsarekin bat egiten baduzue, urriaren 20rako antolatzen ari garen manifestazioa herri honetan inoiz izan den mobilizaziorik handiena bilakatzen laguntzera.

Deskargatzeko >> Ekainaren 2ko deklarazioa eta sinatzaileen zerrenda Pdf.an

by sarenaiz

Espainiako Barne Ministerioren komunikatua eta “Zerga” operazioaren harira Sare Herritarraren oharra:

Espainiako Barne Ministerioak gaur publiko egin duen komunikatuaren eta une honetan irekita duen “Zerga” operazioaren harira Sare Herritarraren oharra:

  • Espainiako Estatuk agertutako jarrerak konfrontazio eta sufrimendu egoera mantentzearen aldeko apustu garbia egiten duela erakusten du. Orain arte bizitako iraunkortzearen aldeko apustua.
  • Ezer aldatu ez bailitzan, iraganari begira jarraitzen du Estatu espainiarrak, euskal jendarte osoari bizkar emanaz, Euskal Herrian batutako iritzi politiko eta sindikalaren gehiengoaren aurka, mendekuaren eta gorrotoaren politikak aplikatzen jarraitzearen alde egin du.
  • Gaurko operazioak argi erakusten du hori. Espetxean zein kalean zigorra bere osotasunean betea izanda ere, giza eskubideen urraketan sakontzen jarraitzen du.
  • Maiatzaren 4a geroztik, garai berri bat ireki da Euskal Herrian elkarbizitzan eta bakean bizi ahal izateko. Estatuak ordea, ETAk emandako urrats atzeraezin eta garrantzitsuari iraganeko teknikekin erantzun dio, inmobilismoan, sufrimenduan eta errepresioan sakonduz.
  • Sare Herritarrak mendekuan oinarritutako eta giza eskubideen aurkakoa den jarrera eta ekintza hauek gogor salatzen ditu eta dei egiten dio jendarte osoari ireki berri den garai berri hau probestu eta elkarbizitza eta bakearen eraikuntzan aktibo izatera. Sarek lan honetan jarraitzeko konpromisoa du.

by sarenaiz

Motxiladun umeen erakusketa martxan da

Motxiladun umeek bizi duten errealita eta euren testigantza zuzenak jasotzen dituen erakusketa inauguratu du Sarek.

Sare Herritarrak herriz herri mugitzen joango den Motxiladun Umeen erakusketa martxan jarri du. Exprai artista nafarraren laguntzaz, Motxiladun Umeen errelitatea eta testigantzak jasotzen dituen erakusketa osatu du. Erakusketan Exprai artistak eginiko marrazkiak, errealitatea era grafikoan agertzen duten irudiak eta gune interaktibo bat du erakusketak (audiobisuala, bixita simulatzen duen kristala eta telefonoak, haur bat eta bere amaren arteko telefono deia, …).

Erakusketaren inaugurazioa Azpeitian egin da, erakusketa ikusgai izango den lehen herria, eta sarrera Azpeitiko Alkateak eta Joseba Azkarragak egin dute, alderdi, sindikatu eta abarren konpainian.

Giza eskubideen defentsan laguntza behar dugu!

Gurekin parte hartu eta ekarpen ekonomikoa egin nahi baduzu SAREINA izatera gonbidatzen zaitugu. Izan Sare!

Izan Sare

by sarenaiz

Sare Herritarrak prentsa agerraldia egin du Bilbon ETAren disoluzioaren osteko bere irakurketa egin eta aurrera begirako ikuspegia elkarbanatzeko.

“Elkarbizitza eta bakea eraiki ahal izateko preso eta errefuxiatuen eskubide urraketaren aferak ardura kolektiboa izatera igaro behar du, ezinezkoa baita mendekuzkoak eta injustuak diren oinarrien baitan adiskidetutako jendarte bat eraikitzea”

Gaur goizean Sare Herritarrak prentsa agerraldia egin du Bilboko La Bolsa eraikinean ETAren disoluzioaren osteko bere irakurketa egin eta aurrera begirako ikuspegia elkarbanatzeko. Joseba Azkarraga eta Bego Atxa bozeramaileek “2018ko maiatzaren 4ean ETAk bere azken erabaki” hartu duela eta “desmobilizatu egin” dela ziurtatu dute, gaineratuz, “ETAko militante izan direnak, aske izan ala preso, gaur gaurkoz jada ez dira ETAko kide, baita ondorio penalei dagokionean ere, jada ezin baitute existitzen ez den zerbaiten parte izan”. Bozeramaileek ideia hau argi utzi nahi izan dute, izan ere, haien ustetan “bada oraindik talde armatu baten existentziaz mintzo denik, gero eta zabalagoa den euskal jendartearen eskariei muzin egin asmoz, zeinak presoek bizi duten eskubide urraketarekin amaitu beharra dagoela eta elkarbizitzan bizitzeko prest dagoela aldarrikatzen du”.

Azkarraga eta Atxak ETA existitu den 60 urte hauetan “urteetako indarkeriaren oinazea eta mina” geratzen direla gogorarazi dute, hainbat eta hainbat “biktima eragin izanaren arddura bere gain hartuaz” apirilaren 8ko komunikatuan, adieraziz “indarkeriak ez zuela sekula existitu behar izan”. Horrez gain, gehitu dute, biktima hauei beste indarkerietako biktimak ere gehitu behar zaizkiela eta hauei ere “besteei zor diegun elkartasun eta errespetu bera” zor zaiela.

Agerraldi honen bitartez, Sare Herritarrak maiatzaren 4a gure historian inflexio une bat izan dela eta inflexio une honek berekin batera bi ondorio dakartzala adierazo nahi izan du:

  • Lehenik, elkarbizitza eta bakea eraiki ahal izateko preso eta errefuxiatuen eskubide urraketaren aferak ardura kolektiboa izatera igaro behar du, ezinezkoa baita mendekuzkoak eta injustuak diren oinarrien baitan adiskidetutako jendarte bat eraikitzea, ezta zauriak eta hamarkadetako indarkeriak utzitako ondorioak sendatu gabe ere. Eta horregatik ere, gure instituzioei lehentasunezko gai gisa kokatzeko eta ardura bere gain ere hartzeko exijitzeko unea da.
  • Bigarrenik, Estatu espainiarrari erreferentzia zuzena eginez, aurrera urratsik ez eman eta euskal presoen giza eskubideen errespetuari muzin egiteko aitzakien amaiera. Estatuak urteak daramatza ematen den urrats bakoitzeko exijentzia berri bat mahai gainean jarriz bere lege propioa dena ez betetzeko -presoen gerturatzea, larriki gaixo diren edo nagusiak diren presoen kaleratzea, graduen aplikazioa, kasu injustuen berrikustea...-. Jada ez da exijitzeko urratsik geratzen, espetxe politikan urratsak emateko unea da. ETAk bere jarduna amaitutzat eman du, jada amaitu dira aitzakiak, aurrerantzean urratsik eman ezean mendekua eta min injustua sortzen jarraitzeko grina baino ez dira geratzen, bereziki senideek, inolako errurik ez duten horiek, jasaten duten min injustu bat.

Baina gaurko egunean, Sare Herritarrak bereziki hurrengoa esateko deitu du agerraldi hau:

ETA, 2011eko urrian hasi eta 2018ko maiatzaren 4ean amaitutako bidean, aurrera urratsak ematera zerk eraman duenaren arrazoiak albo batera utzita, Sare Herritarrak uste du gizarte zibilak bide guzti honetan izan duen rola balioan jarri behar dela, zeinaren bultzadarik gabe, ziurrenik, amaiera hau ez litzake sekula gauzatuko, edota behinik behin, asko luzatuko litzake denboran beharrezko baldintzak ez izanagatik.

Azkarraga eta Atxak gogorarazi dute 2011ko urriaren 20ko erabakia, besteak beste, gizarte zibileko hainbat eragileren aurretiazko lanaren ostean eman zela, Harremanetarako Nazioarteko Taldearen babesarekin. 2017Ko apirilaren 8ko armagabetzea ostera “berau egingarri bilakatu zuen artikulatutako gizarte zibil baten arrakasta irudikatu zuen, kasu honetan Iparraldean”.

“Sarek, agerraldi honetan, pasaden maiatzaren 4tik garai berri bat bizitzen hasi garela azpimarratu nahi du. Zentzu honetan, hamarkadetako sufrimenduarekin amaitzeko eta koponbidean, adiskidetzean eta elkarbizitzan aurrera egiteko sortu den aukera paregabe hau galtzen ez uzteko gonbita luzatu nahi diogu, beste behin ere, gizarte zibilari eta euskal zein espainiar instituzioei”.

Sareko bozeramaileek adierazi dutenez “generazio berri honek guk gure nagusiengandik jaso genuena baino jendarte hobe bat merezi dute. Eta horregatik, gizarte zibila da instituzio, alderdi eta sindikatuekin batera, arduraz eta prespektibaz jokatu behar duena. Garai berri honetan ezin da inor bazterrean geratu”.

ORAIN PRESOAK.
Helburu hau da, une honetatik aurrera, Sare osatzen dugun pertsonon indar guztia mugiaraziko duena. Izan ere, espetxeetako aferari irtenbidea jartzen ez diogun bitartean, euskal presoen eskubideak urratzen jarraitzen diren bitartean, presoen senideak urruntze politikarekin zigortuak izaten jarraitzen duten bitartean, salbuespen legedia aplikatzen jarraitzen den bitartean edota espetxeetan presoak hiltzen jarraitzen duten bitartean ezingo baita benetako bakeaz eta elkarbizitzaz hitz egin.

Sareren lana, une honetatik aurrera, gizarte zibilaren aktibazioa izango da. Gizarte zibilari aldaketarako unea dela eta mobilizatzeko ardura Sarek bere gain hartzen duela adieraziko dio eta baita instituzioei eskariak egitekoa ere, benetako inplikazio bat izan dezaten konponbidearen eta bakearen eraikuntzan.

JUSTIZIA TRANTSIZIONALA
Bada garaia justizia trantsizionalari bide emateko eta beraz:

1.- Gaixo dauden eta adinez nagusiak diren presoak askatzeko, bai eta Euskal Herrira gerturatzeko.
2.- Espetxe eskumena bereganatzeko, bai eta zaintza epaileekiko eskumena, Entzutegi Nazionalaren menpean egoteari uztea beharrezkoa da; Entzutegi Nazionala desagertzea beharrezkoa den moduan. Bere sorrerak zentzurik ez bazuen, gaur are gutxiago. Izan ere, maiatzaren 4az geroztik existitzen ez den erakunde baten kide izateagatik edo berarekin kolaboratzea egozten zaien pertsonak epaitzeak ez baitauka zentzurik.
Hau medioa, epaiketaren zain dauden auziak eta bermerik gabe gauzatutakoak, gertuko epaitegien eskumenpera pasatzea eskatzen dugu, Euskal Autonomi Erkidegoko eta Nafarroako epaitegietara.
3.- Gradu aldaketa eskaerak onartzeko eta behin behineko askatasunari begira betetako zigorrak zenbatuak izateko.
4.- Salbuespen legediari amaiera emateko.
5.- Salbuespen legedian oinarritutako prozesuak berraztertzeko.
6.- Tortura salaketapean eman diren zigorrak berraztertzeko.

by sarenaiz

Beterri-Buruntzan Euskal Presoen eskubideen aldeko ekitaldi sorta antolatu dute Maiatzerako

Euskal presoen, iheslarien eta deportatuen eskubideen aldeko ekitaldi sorta iragarri zuen Beterri-Buruntzako Sarek, Urnietako Etxeberri plazan egin zuen agerraldian. Egun, eskualdeko 27 euskal preso daude. Guztiak urruntzen politikaren menpe. Euren eskubideen aldeko ekitaldiak burutuko dituzte maiatzean:

Maiatzaren 11an Errezitaldi kulturala Lasarte Orian.

Maiatzaren 12an Hernani Motxiladun Umeen gaia landuko dute.

Maiatzaren 20an Santa Barbara eskualdeko irteera.

Maiatzaren 24an Urnietan Joseba Azkarragarekin Hitzaldia egingo dute.

by sarenaiz

Sare Herritarra ostiralean Kanbon ospatuko den Topaketaren parte aktibo izango da

Konponbidearen eta bakearen norabidean urrats garrantzitsu bat ematera goaz datorren maiatzaren 4ean Kanbon “Nazioarteko topaketa Euskal Herriko gatazkaren konponbidean aurreratzeko” ekimenaren baitan. Euskal jendarteak iragana atzean utzi eta sufrimenduarekin behin betikoz amaitzeko urratsak eman nahi eta behar ditu, aurrera egin eta elkarbizitzan eta bakean bizi ahal izateko.

Maiatzaren 4ean gure herriaren historiako pasarte garrantzitsu bat biziko dugu, aldaketa biziki garrantzitsua izango baita Kanbon gauzatuko dena. Herritarrak aldaketa horren parte aktibo izan behar dugu, eta bagara, giza eskubideen errespetuaren, konponbidearen eta bakearen baitan urteak daramatzagulako lanean. Horren erakusle izan da Bakearen Artisauek eginiko lana.

Azken urtebetean Bakearen Artisauek hasitako bidearen fruituak ikusten ari gara, eta orain beste aurrerapausu baten aurrean gaude. Baina ezin dugu ahantzi, aurreko apirilaren 8a gizarte zibilak hartutako konpromisorik gabe pausu urrats berri hau gauzaezina litzakeela. Aurrerantzean ere bide beretik jarraitu behar dugu. Orain arte egin dugun moduan herritar gisa gure oraina eta geroa sufrimendu gehiagorik gabe eta elkarbizitzan oinarritua izateko ardura hartu behar dugu.

Izan ere, maiatzaren 4ko egun historikoaren ostean ere bada zer askatu. Oraindik ere, espetxean diren euskal presoak eta euren senide zein lagunak eskubideak urratuak izaten jarraitzen dute, ehunka kilometrotara urrunduak eta mendekua soilik bilatzen duen salbuespeneko legedi baten baitan bi bider zigortuak. Oraindik ere sufrimendua eta eskubideen urraketa dakarten hainbat korapilo ditugu askatzeko eta bide horretan Sare Herritarrak herritarren laguntzarekin lanean jarraitzeko konpromisoa berretsi nahi du, elkarrekin konponbidearen baitan aurrera egiten jarraitzeko konpromisoa. Ostiralean bide horretan urrats handi bat emango dugu. Eta datozen hilabeteetan euskal presoen eskubideen defentsari indar berberaz eusteko une berri bat irekiko da.

by sarenaiz

Arabako Batzar Nagusiek eta sindikatuek urruntze politikaren aurkako adostasuna lortu dute

Arabako Batzar Nagusiek (PP kanpo) urruntze politikaren amaiera eskatzen duen akordioa eskuratu dute, sindikatu guztien babesarekin.

PP izan ezik gainontzeko alderdien babesarekin onartu da gaurko Arabako Batzar Nagusietako plenoan urruntze politikarekin amaitzeko eskaria. Akordio honek sindikatuen babesa ere jaso du, ELA, LAB, CCOO, UGT, Steilas, ESK, EHNE, Hiru eta Etxalderen sinadurarekin.

> Pretsan bildutakoak

> NAIZ

Urruntze politikaren amaiera eskatu du Arabako gehiengo politiko eta sindikalak.

PPk ez beste alderdi guztiek espetxe politika berri baten eta urruntzearen amaieraren eskaerarekin bat egin dute Arabako Batzar Nagusietan. Adostasun zabal horrek arlo sindikalean ere izan du isla, ELA, LAB, CCOO, UGT, Steilas, ESK, EHNE, Hiru eta Etxaldek ere babesa adierazi dutelako.

Jarraitu irakurtzen

> BERRIA

Urruntze politika amaitzeko eskatu dute Arabako Batzar Nagusiek

«Errotze sozial eta familiarretik urrun zigorrak ez betetzea saihestuko duen eta senideekin harremanak erraztuko dituen» espetxe politika bat galdegin dute. Sindikatu guztiek bat egin dute eskariarekin.

 

Jarraitu irakurtzen

> EL CORREO

El PP se queda solo en las Juntas de Álava, que reclaman el fin de la dispersión de los presos de ETA

Todos los grupos políticos, salvo los populares, han respaldado una moción impulsada por el Foro Social.

Jarraitu irakurtzen

by sarenaiz

Igandean Motxiladun haur bat gutxiago ekitaldia Izarrekin Sara Etxera Plataformak antolatuta

Sara Majarenas euskal presoak askatasuna eskuratu ostean, motxiladun hau bat gutxiago dugu Euskal Herrian. Izarrek bizitako egoera eta motxiladun haurrena salatzeko ekitaldia egingo da igande honetan Donostian.

Izarrekin Sara Etxera plataformak ekitaldia antolatu du igande honetarako, apirilaren 22rako, “Motxiladun umeak bat gutxiago” lelopean. Plataformaren azken agerraldia izango da. Sara Majarenas presoa aske geratu ostean, 4 urteko Izar txikiak motxiladun ume izateari utzi diola ospatuko dugu, baina azken urte honetan bizi izan duen egoera gogorra ere salatuko dugu. Aldi berean, oraindik ere Euskal Herrian motxiladun ume asko daudela gogorarazi eta egoera honi amaiera jarri behar zaiola aldarrikatuko dugu.

Ekitaldia 12.00etan egingo dugu Intxaurrondoko Txaparrene pasealekuan (kioskoa dagoen plazatxoan). Ekitaldian zehar Izarrekin Sara Etxera plataformak, Donostiako mugimendu feministak eta Motxiladun umeen ordezkari batek hartuko dute hitza, halaber, bertan izango da Porrotx pailazoa, eta bertsoak, musika eta dantza ere ez dira faltako.

by sarenaiz

Ekimenak Bizkaia eta Nafarroan Osasunaren Nazioarteko Eguna dela eta

Osasunaren Nazioarteko Eguna dela eta, hainbat ekimen egin dira Bilbon eta Iruñean salbuespen neurriek euskal presoen osasunean duten eragina salatzeko.

Aste honetan urtebete da apirilean ETAk gizarte zibilaren bultzadaz armagabetzea gauzatu zuela. Gaur gaurkoz ordea, urrats honen aurrean, urteetan luzatu den mendekuzko espetxe politikak bere horretan darrai. Osasunaren Nazioarteko Eguna den honetan, Sare Herritarrak espetxean larriki gaixo diren pertsonak gogora ekarri nahi ditu eta euskal presoen osasunean bereziki eragiten duten funtsezko bi faktore nabarmendu:

  • Euskal presoei ezartzen zaien salbuespeneko espetxe-politika: isolamendua, zigorraren luzapena eta urruntze politikak preso dagoen pertsonaren osasunean eragin zuzena dute, ezegonkortasuna, arazo psikologikoak, antsietatea, harremanak garatzeko arazoak… sortzen ditu. Gaixo diren presoen kasuan gainera, gaixotasunari aurre egiteko aukerak murrizten ditu, gertukoen babesa, bizi baldintza duinak edota konfiantzazko medikuen jarraipena ez izateak eragin zuzena baitu.

  • Espetxeetako osasun-baldintza kaxkarrak: espetxeak berak instituzio gisa, hala nola zentroak, medikuen jarrerak eta baliabide faltak, osasunean eragin negatiboa izaten dute. Espetxeek ez dute behar bezalako osasun-zerbitzua emateko aukerarik eskaintzen. Osasuna pertsona guztiei dagokien eskubidea da, baita preso diren pertsonei ere. Ezin dugu segurtasun politiken aitzakia pean presoen oinarrizko eskubideak zapaltzen dituen politikarik onartu. Preso orok konfiantzazko mediku edo psikologo baten laguntza jasotzeko eskubidea du.

Politika honen ondorio larri eta dramatikoenaren lekukoak gara espetxean bizia galdu duten euskal presoen zerrendak aurten ere gora egin baitu eta horren adibide da Xabier Reyren kasua. Egun 22 dira larriki gaixo diren presoak. Sarek argi du salbuespen politika hau desagertzen ez den bitartean eskubide urraketa honen ondorio lazgarriei aurre egiten jarraitu beharko dugula.

Horregatik eragile sozial, sindikal eta politiko guztien inplikazioa eta laguntza behar dugu, behin betikoz, presoen eskubideak errespeta ditzaten eskatzeko, espetxea ere gure gizartearen zati bat baita. Denon artean eta guztion bultzadaz lortu ahal izango baitugu euskal presoen oinarrizko eskubideak betetzea eta konponbidearen eta bakearen baitan urratsak ematea.

 

by sarenaiz